ភ្នំពេញ៖ កន្លងមក ជឿជាក់ថាអ្នកគាំទ្រវិស័យកីឡាបាល់ទាត់ប្រាកដជាបានស្គាល់រួចមកហើយនូវអ្នកគាំទ្របាល់ទាត់ និងកីឡាផ្សេងៗយ៉ាងចាស់វស្សាមួយរូបគឺលោក អ៊ុំ សួន ដែលជានិច្ចកាលគេតែងឃើញមុខលោកព្រឹទ្ធាចារ្យរូបនេះមកចូលរួមទស្សនា និងគាំទ្រការប្រកួតកីឡារបស់កម្ពុជាពុំសូវខានឡើយ។ 

មួយរយៈពេលថ្មីៗនេះ ជាពិសេសក្នុងអំឡុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ វត្តមានលោកអ៊ំក៏នៅតែបន្តគាំទ្រ និងមកទស្សនាផ្ទាល់ ប៉ុន្តែដោយសារបានការជួយសម្រួលពីមហាជន ជាពិសេសអ្នកគាំទ្រវ័យក្មេង និងការជួយសម្រួលពីសហព័ន្ធបាល់ទាត់ផ្ទាល់ ដែលបានប្រគល់ជូនសំបុត្រដល់លោកអ៊ំដើម្បីបានទស្សនាការប្រកួត ត្បិតសំបុត្រដែលចែកជូនមានអ្នកគាំទ្រច្រើនរង់ចាំទទួលដែលនេះគឺជាការលំបាកមួយសម្រាប់លោកអ៊ំដែលមានវ័យចំណាស់។ 

យ៉ាងណាមិញ នៅរសៀលថ្ងៃទី០៧ ខែឧសភា ឆ្នាំ២០២៣ នេះ ពោលគឺមុនការប្រកួតរវាងក្រុមជម្រើសជាតិកម្ពុជា ជួបជាមួយមីយ៉ាន់ម៉ាយប់នេះ សហព័ន្ធបាល់ទាត់កម្ពុជា បានផ្តល់ជូននូវកិត្តិយសយ៉ាងធំធេង ពោលគឺការផ្តល់បណ្ណទស្សនាការប្រកួតបាល់ទាត់ឥតគិតថ្លៃពេញមួយជីវិត សម្រាប់លោកព្រឹទ្ធាចារ្យ អ៊ុំ សួន។ នៅលើទំព័រហ្វេសប៊ុករបស់សហព័ន្ធបាល់ទាត់កម្ពុជាបានបញ្ជាក់ថា "សហព័ន្ធកីឡាបាល់ទាត់កម្ពុជា នឹងប្រគល់ជូន “ប័ណ្ណទស្សនាការប្រកួតពេញមួយជីវិត” ជូនដល់លោក អ៊ុំ សួន ដែលជាអ្នកស្នេហាកីឡាបាល់ទាត់កម្ពុជា ជាយូរអង្វែងមកហើយ។ ប័ណ្ណនេះ នឹងមានអាទិភាព អាចចូលទស្សនាគ្រប់ការប្រកួតទាំងអស់ដែលស្ថិតក្រោម ឬរៀបចំដោយសហព័ន្ធកីឡាបាល់ទាត់កម្ពុជា ទាំងការប្រកួតថ្នាក់ជាតិ និងអន្តរជាតិ នៅក្នុងទឹកដីព្រះរាជាណាក្រកម្ពុជា"៕